पग डांडी रा मोड़ मिनख रै
उणियारै री आरसी।
चेते रा चितराम जगत री
तपती काया ठारसी।
आभो है अणजाण धरा पर
आखर कंवळा है-
चूळे अणबूझ आंच
चेतरा मारग अंवळा है
भभक उठैली हाय-लाय
जद कण-कण मन रो धारसी।
बळती चाली पवन
बिरछ रा पीळा पड़िया पात
फळ मांदा कद बीज वणैला
माळी करियां घात
चेत मानखा राख रूखाळी
लोग मिनख नै मारसी।
बाळू-भीत अकल री ओछी
पल भर री है पावणी
मान करै आ मे-आंधी रा
लागै है अणखावणी
काठ री हांडी चूळै चढ़ियां
बळ-जळ आपो हारसी॥
