दरखत उपरै छायी उदासी!
पण मनखां म्हं बढ़'री हांसी!!
आज वनां रो नाश हो रियो
जाणबूझकर ई बेंडो बण
दरखत कटा रियो-2
बड़ा बडैरा सा ये रूखड़ा!
खड्या धीर औतार बण्योड़ा!!
पण मनखां के रास हो रियो ...
जाणबूझकर ई गैल्यो बण
दरखत घटा रियो-2
कांट-छांटकर कर दिया घाटा!
आज हरख म्हं कय्या बांटा?
मनख जीवती लाश हो रियो....
जाणबूझकर ई बेंडो बण
दरखत कटा रियो-2
दरसण खातर बच्या रूंखड़ा!
खेत-खेत रा हुया टूकड़ा!!
मनख रूप्या रो दास हो रियो....
जाणबूझकर ई गैल्यो बण
दरखत घटा रियो-2
जहरिलो बायरियो बढ़ग्यो!
देख बिच्चारो टाबर मरग्यो!!
आज लेवणो सांस हो रियो...
जाणबूझकर ई गैल्यो बण
दरखत कटा रियो-2
बैमारियां नित कर'री हमलो!
अब तो भाया थे झक ले लो!!
आज जीव निष्प्राण हो रियो...
जाणबूझकर ई बेंडो बण
दरखत घटा रियो-2
