अळगोचां री ताण खेत पर
ढ़ोलक री ढ़मकार!
मंजीरा का शौर बीच म्हं
नाच रियो बळ खा'र!!
ऊ देख भायला
मरूधर रो मोट्यार
घूम घूमकर घूमरियो है!
बायरिया की ला'र
साखी दे दे झूमरियो है!!
मूच्छ्या ने तणकार
ऊ देख भायला-2
मरूधर रो मोट्यार
लटक-लटक कर लटक
रियो है धोती ने फटकार!
मटक-मटक कर मटक
रियो है मुंडे पान चबा'र!!
ऊ देख भायला- 2
मरूधर रो मोट्यार
लाठी लेयर घूम रियो है
बैरिया ने चमकार!
जुद्ध मांयने धूम मचावे
मारे है तड़फा'र!!
ऊ देख भायला-3
मरूधर रो मोट्यार
अळगोचां री ताण खेत पर
ढ़ोलक री ढ़मकार!
मंजीरा का शौर बीच म्हं
नाच रियो बळ खा'र!!
ऊ देख भायला-2
मरूधर रो मोट्यार
'अंकुर' हिवड़े गीत रागणी
श्रोता री दरकार!
रजथानी मोट्यार साथ म्हं
मीठी सी मनुहार!!
ऊ देख भायला-2
मरूधर रो मोट्यार...
