कुण कुण रा मन मार अठै तूं कुण कुण नै बिलमासी।
लिछमी रूपांधार तनै तौ घणा जणा बतळासी।
थारी चाल-ढाल में चटका, थारी बात-बात में लटका,
जोबन री पणियार हेत री बादळियां बरसासी।
छम-छम बाजै पायल थारी, तीखा दीरघ नैण कटारी,
सज सोळा सिणगार घणेरी, निजरां नै उळझासी।
तूं आवै हिवड़ा हुळसावै, तूं जावै जिवड़ा कुमळावै,
जगत करै मनवार नवेली, जठै- जठै तूं जासी।
तूं बोलै इमरत रस घोळ, तूं झांकै रस राग झकोळे,
जासी जिण-जिण द्वार प्रीत री पगथळियां परसासी।
जितरी बणी-ठणी तूं आवै, उतरा भोळा हिया रिझावै,
रूप-कळी कचनार, ठगोरी मन भंवरा भरमासी।
लखपत पांव पुजारा थारा, धनपत मोल कुंतारा थारा,
घर-घर भोग लगार अटास्यां में आंचळ उजळासी।
लिछमी रूपांधार तनै तौ घणा जणां बतळासी।
