अलबेलो हठीलो म्हारो गरबीलो गुमान रै।
प्यारो राजस्थान म्हारो प्यारो हिन्दुस्तान रै॥
पन्ना, पद्मा, झांसी राणी,
चूंडावत मांगी सैनाणी
टूट पड्यो बैर्या रै माथै
जद माच्यो घमसाण रै
प्यारो राजस्थान म्हारो
प्यारो हिन्दुस्तान रै
गोरा, बादळ, सेर सिवाजी,
अमर सिंग राणा ली बाजी
हळदी घाटी याद दिरावै
भामासा प्यारो रो दान रै
प्यारो राजस्थान म्हारो
प्यारो हिन्दुस्तान रै
लाल, बाल, आजाद अर गांधी,
आतम बल लिन्हीं आजादी
सत्य-अहिंसा पाठ पढ़ायो
जाणै जगत जहान रै
प्यारो राजस्थान म्हारो
प्यारो हिन्दुस्तान रै
निपजै सोनो हीरा मोती
जलम भोम संता री ज्योति
धन-धन हे धोरां री धरती
धन तेरो किसाण रै
प्यारो राजस्थान म्हारो
प्यारो हिन्दुस्तान रै
