चाली सिव पांवां सूं विस्णुधारा फेरती सुमेर चट्टां,
घेरती चोफेर घट्टां ब्रम्ह कुंडां घोळ।
चोडंडां हेरती थंडां चहुं दिसा चौधार चाली,
ज्यूं गंगोत्री मेरती धारा भूडंडां भूगोळ।
हसंती संहस्न धारा किलोळां करंती हदां,
भागीरथी हिलोळां भरंती नंद्यां भाप।
सिंभू गती इलोळां धरंती अद्री टोळां सीस,
सिमरत्थी हिलोळां दोळां हरंती संताप।
जोत छाई अछाई सबद्दां भू पूरती जोर,
बेदां गाई मूरती व्रबद्दां धू बाखांण।
घेदारै अद्रका धाई चूरती सूरती धारा,
ज्यूं केदारै बद्रिका आई मूरती कल्याण।
तराजै उंडां में केई तुंडां में बिराजै तोरी,
थिराजै उग्राजै केई थुंडां में सुथाह।
निवाजै गिल्लका बद्री गिरा में अपट्टा नीर,
आवाजै अग्राजै केई कुंडां में अथाह।
बरफांण फोड़ती थकी पंयाळां रोड़ती बार,
पहाड़ां रोड़ती थकी तोड़ती पैस्त्रंग।
थटावै पळक्की बद्री किन्द्रां में भळक्की थकी,
रूद्र प्रभु मिन्द्रां में खळक्की थकी रंग।
ओळा अद्री द्रोळा आंटा खांवती मिलप्पा आवै,
समाया बिलंदां दोळा बिलप्पा सुनीर।
जै जै नीर सबोळा झबोळा भू तरंगा झल्लै,
तै तै नीर छोळा भू हबोळा गंगा तीर।
दुरसती हराजै भीर भिल्ला में चबीणी दोत,
पुरसती सुराजै नीर रिल्ला में सुप्यार।
जमना सुरसती गंगा बिराजै जिल्ला में जोत,
उरसती अग्राजै प्राग किल्ला में उदार।
मैलोकां पावनी सारा उपाया संसार माया,
तैलोकां भावनी जोगमाया जै सुतार।
छिवंती बिसेसुर नाथ कासी में बैहन्ती छाजै,
बैदनाथ बासी में रैहंती राजै बार।
रचाती खलास लीला रचोळां अनेकां रूप,
मचाती कैलास कीला कचोळां मनोद।
भेळे अद्री चोजां सूं सचोळां देती नंदद्यां भेळी,
मेळै सिंधु मोजां सूं मचोळा देती मोद।
साजोत्रां बागो थको भूमंडां, बावन्नू सूप,
छाजोत्रां बागो थको धूमंडां उछाह।
आदोत्रां लागो थको ऊमंडां ऊतरे अम्बे,
बादोत्रां बागो थको घूमंडां प्रवाह।
गाजै घोर घटा में झरंगां बाजै गिरा गोड़,
राजै तोर छटा में बरंगां धू बिरोड़।
साजै तोर छटा में तरंगा गंगा मेर सूदा,
छाजै धार जटा में तरंगा गंगा छोळ।
यूं नामां अनेका एक रचावै अखण्डी अम्बे,
भारतां समंडी बेद बचावै बमेक।
चोथंडां पचावै रास रचावै दयतां चंडी,
एकां रूप ब्रहैमण्डी रचावै अनेक।
जटां सूंज धार्या जो प्रलोक उधार्या जानूं,
तठां सूंज धार्या जो त्रिलोक तीनूं ताप।
बठां सूं पधार्या बानूं भू परां सूं संकर बंदै,
उठां सूं भलां ही अम्बा पधार्या जू आप।
धरे गंगा धरे गंगा धरे गंगा संहस् धारा,
सरे गंगा सरे गंगा मनोकाम सार।
हरे गंगा हरे गंगा हरे गंगा ताप हारी,
तरे गंगा तरे गंगा तीन लोक तार।
