म्हूं तो मन मानै ज्यूं राचूं।
सांवरियो बण कागद लिख द्यूं,मीरां ह्वै फिर बांचूं।
कदै वेदना हँस-हँस गांऊं, कदै खुशी में रोऊं।
मनभाव मणिमुकता माळा, जोड़ूं-तोड़ पिरोऊं।
लड़ियां-कड़ियां आंच अणभव,कर-कर कुंदन जांचूं।
म्हूं तो मन मानै ज्यूं राचूं।।
कदै सबद री करूं साधना, कदै नाद सूं यारी!
अमर पियाला कविता पीतो, भाव भर्योड़ा भारी!
प्रणव नाद री चिलम बणेंनें, जोगी कद कद खांचूं।
म्हूं तो मन मानै ज्यूं राचूं।।
कदै मौन री साखी बोलूं, कदै सबद री हेली!
रीझूं खीझूं खुद ई खुद पर, म्हूं सांई म्हूं बेली!
मन आंगण पद घूंघर बांधै,नरपत छम-छम नाचूं।
म्हूं तो मन मानै ज्यूं राचूं।।
