चाली सिव पांवां सूं विस्णुधारा फेरती सुमेर चट्टां,
घेरती चोफेर घट्टां ब्रम्ह कुंडां घोळ।
चोडंडां हेरती थंडां चहुं दिसा चौधार चाली,
ज्यूं गंगोत्री मेरती धारा भूडंडां भूगोळ॥
हसंत्ती संहस्र धारा किलोळां करंती हदां,
भागीरथी हिलोळां भरंती नंद्यां भाप।
सिंभू गत्ती इलोळां धरंती अद्री टोळां सीस,
सिमरत्थी हिलोळां दोळां हरंती संताप॥
जोत छाई अछाई सबद्दां भू पूरती जोर,
बेदां गाई मूरती न्रबद्दां धू बाखांण।
धेदारै अद्रका धाई चूरती सूरती धारा,
ज्यूं केदारै बद्रिका आई मूरती कल्यांण॥
निवाजै गिलक्का बद्री गिरा में अपट्टा नीर,
तराजै उंडां में कोई थूंडां में सुथाह।
बरफांण फोड़ती थकी पंयाळां रोड़ती बार,
आवाजै अग्राजै केई कुंडां में अथाह।
थटावै पळक्की बद्री किन्द्रां में भळक्की थकी,
पहाड़ां रोड़ती थकी तोड़ती पैस्रंग।
ओळा अद्री दोळा आंटा खांवती मिलप्पा आवै,
रूद्र प्रभु मिन्दां में खळक्की थकी रंग।
समाया बिलंदां दोळा बिलप्पा सुनीर।
जै जै नीर सबोळा झबोळा भू तरंगा झल्ले,
तै तै नीर छोळा भू हबोळा गंगा तीर।
दुरसती हराजै भीर भिल्ला में चबीणी दोत,
पुरसती हराजै नी रिल्ला में सुप्यार।
जमना सुरसती गंगा बिराजै जिल्ला में जोत,
उरसती अग्राजै प्राग किल्ला में उदार।
मेलोकां पावनी सारा उपाया संसार माया।
तैलोकां भावनी जोगमाया जै सुतार।
छिवंती बिसेसुर नाथ कासी में बैहन्ती छाजै,
बैदनाथ बासी में रैहती राजै बार।
रचाती खलास लीला रचोळां अनेकां रूप।
मचाती कैलास कीला कचोळां मनोद।
भेळे अद्री चोजां सूं सचोळा देती नंदयां भेळी,
मेळै सिंधु मोजां सूं मचोळा देती मोद।
साजोत्रां मागो थको भूमंडां बावन्नू सूप,
छाजोत्रां बागो थको धूमंडां उछाह।
आदोत्रां लागो थको ऊमंडां ऊतरे अम्बे,
बादोत्रां बागो थको घूमंडां प्रवाह।
गाजै घोर घटा में झरंगां बाजै मिरा गोड़,
राजै तोर छटा में बरंगां घू बिरोळ।
साजै तोर छटा में तरंगां गंगा मेर सूदा,
छाजै धार जटा में तरंगां गंगा छोळ।
यूं नामां अनेका एक रचावै अखण्डी अम्बे,
भारतां समंडी बेद बचावै बमेक।
चोथंडां पचावै रास रचावै दयत्तां चंडी,
एकां रूप ब्रहैमण्डी रचावै अनेक।
जटां सूंज धार्या जो प्रलोक उधार्या जानूं,
पठां सूंज धारया जो त्रिलोक तीनूं ताप।
बठां सूं पधारया बानूं भू परां सूं संकर बंदै,
उठां सूं भलां ही अम्बा पधारया जू आप।
धरे गंगा धरे गंगा धरे गंगा संहस्त्र धारा,
सरे गंगा सरे गंगा मनोकाम सार।
हरे गंगा हरे गंगा हरे गंगा ताप हारी,
तारे गंगा, तरे गंगा तीन लोक तार।
चाली सिव पांवां सूं विस्णुधारा फेरती सुमेर चट्टा,
घेरती चोफेर घट्टां ब्रम्ह कुंडा घोळ।
