अपणायत इसी जगा ले तूं
सगळां नै गळै लगा ले तूं
मिनखां-मिनखां में भेद किसो?
सै एक खनेड़ै री माटी।
कुण जाणै क्यूं लड़ र्या भिड़ र्या
कुण पढा रयो उलटी पाटी
बरसण दे प्यार अभिंतर रो,
धरती जुग-जुग स्यूं प्यासी है
हरसण दे हियो जमानै रो,
छिप बैठी जठै उदासी है
रूस्यां नै आज मना ले तूं
बिगड़ी नै फेर बणा ले तूं
अपणायत इसी जगा ले तूं,
सगळा नै गळै लगा ले तूं
घिन री चिणागारी नाखणियां,
घर-घर में आग लगा रया है
बळती में पूळो फैंकणियां,
नित नूंवो भूत जगा रया है
विस्वास तोड़नै में लाग्या,
बै प्रभु रा दोसी होवैला
बिस-फळ ही झोळै में आसी,
बिस-बीज अठै जो बोवैला
इमारत रा बीज उगा ले तूं
भलपण रा साज सजा ले तूं
अपणायत इसी जगा ले तूं,
सगळां नै गलै लगा ले तूं।
भीतर भगवान नींद में है,
झट हेलो देर जगा अब तो।
चुपकै सैतान घुस्यो घर में,
ललकार लगार भगा अब तो
धरती माता रो दूध पियो,
ओ मिल्यो उजाळण रो मोको।
जो अणी चुकग्यो अबकै तो,
जीवन भर रै ज्यासी धोको।
उख्ड़यां नै फेर जमा ले तूं
बिखरयां नै आज मिला ले तूं,
अपणायत इसी जगा ले तूं,
सगलां नै गळै लगा ले तूं।
