मौत उडीकै बैठ झरोखै
सांस बगै बगतां नै टोकै
रात-दिवस रै इणी फिकर में काया गळगी रे
मौत सांसां नै छळगी रे...
रहूं जागतो मरणौ सूझै
नींदां मांही सपना धूजै
यूं लागै बिन हाथ पगां ई
मिनख जमारो रण में जूंझै
भैम बिरछ री जड़ म्हारी रग-रग में रळगी रे
मौत सांसां नै छळगी रे
काया सूं अपणेस घणेरौ
पण जद सूं ई रौ पगफेरौ
पड़ियो म्हारी यादां मांही
आसा बदळ रोज बसेरौ
आधी ऊमर इणीं अदळ बदळी में ढळगी रे
मौत सांसां ने छळगी रे...
म्हारा दो नेणां रै सागै
अणसैंधौ उणियारौ जागै
बात करूं तौ बोलै कोनी
नीं बतळावूं बातां लागै
आंसू री बरसात दरद री खेती फळगी रे
मौत सांसां ने छळगी रे...
झूंठौ धीरज मन बिलमाणौ
भोळी बातां चित उळभाणौ
कितरा दिन तक औलै रैसी
खुद सूं खुद रो भेद छिपाणौ
परबत जैड़ी आस बरफ री भांत पिघळगी रे
मौत सांस नै छलगी रे
