सुणों पीवजी हठीला, म्हांरा छेल'रै छबिला,
म्हांरी मानो ओ बादिला, बदकारी लागै,
छोटकी दयोराणी म्हांनै खारी लागै।
नो मण राखै थोबड़ो जी, नखरो डूंगर जाय,
बतळायां बोलै नहीं जी, बोलै है बळखाय,
खड़ी डागळै बुलावै, झूठी देवर नै लगावै,
उधा-सूंधा क्यूं भिड़ावै, कळखारी लागै,
छोटकी दयोराणी म्हांनै खारी लागै।
ना सुसरै को कायदो जी,ना जेठां री काण,
सासू जी नै गिणैं कोनी होग्या बू'डा हाण,
बाण खोडली पड़ी, पोळ्यां उभी रै खड़ी,
देखै घड़ी रै घड़ी, धड़कारी लागै,
छोटकी दयोराणी म्हांनै खारी लागै।
देवरिये री बातां छोडो, है बादी रो ठूंठ,
कोडो दर कमावै कोनी, बण्यों फिरै रंगरूट,
बूंट पालिस करै, दिन भर छैल-सो फिरै,
सूत्यो डागळै चरै तपधारी लागै,
छोटकी दयोराणी म्हांनै खारी लागै।
नाकै करदयो बालमा जी छोडो आं'सै सीर,
नाकै चूलो बाळस्यां जी, नाकै रांधा खीर,
पीर हिये री टळै, नां ही काळजो बळै,
म्हांरो जीव ना जळै, नां कटारी लागै,
छोटकी दयोराणी म्हांनै खारी लागै॥
देवरिये नै कहस्यां थारी, भवड़ न समझाय,
दिन भर खड़ी माला मारै, कुणबै री पत जाय,
मांय डोकरी डरै, बैठी सोच यूं करै,
नाकै कर्यां ही सरै, नखरारी लागै,
दोनूंवां की राड उधारी लागै।
मतना होवै गोरी धण तूं यूं मन में उदास,
झूठी बळ-बळ क्यूं करै जी ई काया को नास,
खास बात मैं बताऊं, तन्नै सागै मैं ले ज्याऊं,
तनै जैपरियो दिखाऊं, तेरै सांवरिये की नौकरी,
सिरकारी लागै, काळजिये री कोर म्हांनै प्यारी लागै।
