बौ तौ बौ रौ बौ ई सागी!
जाणणियौ बाजै बडभागी
प्राणां तणौ प्राण है बौ ई
सगळी ओळखाण है बौ ई
वाणी-तणी जिकौ है वाणी
बौ ई बौ तौ है साच्याणी
बौ मन रौ मन जोगी-जागी
बौ तौ बौ रौ बौ ई सागी।
कानां तणौ कान है बौ ई
सांभळ! महागान है बौ ई
नैणां तणौ नैण जाणलै
इण परवाणै तूं पिछाणलै
बौ त्यागी, भोगी, अनुरागी
बौ तौ बौ रौ बौ ई सागी।
जाणणियै रा है पौबारा
नीं जाण्यां तूं जलम दुबारा
जाण्यां मरै नी जामै कोई
अणजाण्यौ बण जावै बौ ई
नीं जाणणियौ है निरभागी
बौ तौ बौ रौ बौ ई सागी।
