काछबो कईजे जळ रे मंईलो जीव
आपरी सौगन म्हारे जीव री सौगन
धण री बण जावां रे ऊंडे जळ री माछळी
माछळी म्होंरा राज!
हालो नीं नणदल हठीली सरवरिये तळाव
घणियल घोळी जावां झूलणिए रे मिस आवै रे
आवै राणो काछबो म्हों रा राज!
बाळां रे झाळां पिंपळियै रा पान
आपरी सौगन अरगतड़ी लगवा दां रे
पींपळ थारै पेड़ मों म्होंरा राज!
हालो रे नणदल बाई बड़ रे पिंपळियै छांव
आपरी सौगन/जीव री सौगन
हिंडणियै रे मिस आवै रे
आवै तो राणो काछबो म्हों रा राज!
ए केय द्यो नणदल बाईसा
थांरै मनड़ै रे मांयली बात
आपरी सौगन कितरा दिनां सां आवै
आवै ओ राणो काछबो म्हों रा राज!
गुणल्यो भाभच इये पिंपळियै रा पान
घणियल घोळी जावां इतरा दिनां सा आवै
पधारे रे राणो काछबो म्हों रा राज!
