सूरज जिसौ अे उजास, मिरगानैणी जी राज
चांदै जिसी अे बा धण ऊजळी, जी म्हां रा राज
दूधां जिसौ अे उफाण, घणी अे प्यारी जी राज
दही अे सरीसी बा धण कठकठी, जी म्हां रा राज
मिसरी जिसौ अे मिठास, मिरगानैणी जी राज
लूंग सरीसी प्यारी चरचरी, जी म्हां रा राज
सीस वण्यौ अे नारेल, मिरगानैणी जी राज
चोटी तो कहियै वासग-नाग की सी, म्हां रा राज
नैण नींबू की ज्यूँ फाड़, मिरगानैणी जी राज
अधरां तो लाली छा रही जी, म्हां रा राज
नाक सूवै की चूंच ज्यूँ, मिरगानैणी जी राज
अधरां तो लाली छा रही जी, म्हां रा राज
दांत दाड़म का जी बीज, मिरगानैणी जी राज
जीभड़ल्यां तो अमरत वसै, जी म्हां रा राज
वेलण बेली जी बांह, मिरगानैणी जी राज
मूंग-फळी सी धण री आंगळी, जी म्हांरा राज
मगर वण्या मखतूल, मिरगानैणी जी राज
पसवाड़ा तो पासै ढाळिया, जी म्हां रा राज
पेट गवां की जी लोथ, मिरगानैणी जी राज
सूंडी तो कहियै रतन-कचोळियां, जी म्हां रा राज
जांघ केळै का जी थांभ, मिरगानैणी जी राज
पींडी तो कहियै रतनाळियां, जी म्हां रा राज
पांव पींपळ का जी पात, मिरगानैणी जी राज
अेडी तो कहियै सुरंग सुपारियां, जी म्हां रा राज
