दुख-सुख रा
मैणा मत द्यै रे मेवाड़ी राणा
परदेसी नों धोखो मत द्यै
मै’लां सूतोड़ा रे
गौरल पगड़ै री पायळ
ऊभी-ऊभी रे
बाटां जोवां मेवाड़ी राणा
परदेसी नों धोखो मत द्यै
लिखै-लिखै कागदिया म्हैं
ओ पियाजी नों मेलां
इयै रे संदेसे मंईनां आव मेवाड़ी राणा
रोंसीलै नों धोखो मत द्यै
रात सूती नै म्हांनै सपनो जी आयौ
सपनो जीव रौ जंजाळ मेवाड़ी राणा
परदेसी नों धोखो मत द्यै
रोंसीलै नों धोखो मत द्यै
थारै कारणियै रे
म्हैं झुर-झुर सांवळी
ऊभी-ऊभी रे बाटां जोवां मेवाड़ी राणा
परदेसी नों धोखो मत द्यै
सभा में बैठोड़ां रे आंख फरुकै
झुर-झुर सांवळा पड़ग्या मेवाड़ी राणा
परदेसी नों धोखो मत द्यै
