म्हनै पीवरिये ले हालो सा
बाईसा रा बीरा पीवरिये पोंचा दो सा
पीवरिये री म्हनै ओळ्यूं आवै
पियाड़ी-पियाड़ी गोरी
सासरियो सुरंगौ ए
पीवरिये री कियां ओळ्यूं आवै
ओ गोरी पीवरिये री कियां मन में आवै
थांरा तो माऊ सा
म्हां सूं पाणीड़ो भरवावै सा
पतळी कमर म्हारी
लुळ-लुळ जाय
पीवरिये री म्हनै ओळ्यूं आवै
पाणी नै भरण नै
गोरी पणिहार्यां लगा दूं ला
पतळी कमर थांरी
कियां लुळ-लुळ जाय
पीवरिये री कियां ओळ्यूं आवै
थांरां तो बाईसा
म्हां सूं आडा-तेडा बोले सा
पीवरिये री म्हनै ओळ्यूं आवै
म्हारा बाईसा गोरी
बागां री कोयल ए
दिन दो रैसी वो तो उड़ जासी
पीवरिये री कियां ओळ्यूं आवै
म्हारै तो भाभल रे सायबा
म्हैं ई कोयलड़ी रे सा
पीवरिये री म्हनै ओळ्यूं आवै
बाईसा रा बीरा
म्हनै पीवरिये ले हालो सा
पीवरिये री म्हनै ओळ्यूं आवै
