आज तो सहेल्यां म्हारी, घटा ए उमटी
रुक-रुक चालै सूरियो।
कहो तो सहेल्यां, आपां बागों में चालां
अमवा री डाळी हींडो घाल्यो,
रेसम डोर बँधायो।
कहो तो सहेल्यां आपां बागों में चालां
बागाँ में हींडो ए घलायो।
माली की बेटी म्हाने झाल्या ऐ देगी,
ओ झूलो म्हारे मन भायो
कहो तो सहेल्यां, आपां बागों में चालां
बागाँ में हींडो ए घलायो।
सात सहेल्यां आपां
म्हारे मन कोड'ज छायो
कहो तो सहेल्यां आपां बागों में चालां
बागाँ में हींडो ए घलायो।
