मां गौरां गै, जायो अे गजानन्द जायो अे गजानन्द
मोतीयां गी माळा मांगै जी
दो च्यार थपड़, मार्या अे गौरजां मार्या अे गौरजां
आळै में बिठायो जी
बाहर सैं, सिवसंकर आयो संकर आयो
मेरै अे गजानन्द नै कुण मार्यो
थारो रे गजानन्द, बड़ो अे हठीलो बड़ो अे हठीलो
मोतीयां गी माळा मांगै जी
दो च्यार मोती, देद्यो अे गौरजां देद्यो अे गौरजां
गजानन्द नै मत ललकारो जी
मोती ले’गे गजानन्द, पिता धोरै गयो पिता धोरै गयो
अै मोती कद बीजां जी
सनीवार गा ना बीजो, अदीतवार गा ना बीजो अदीतवार गा ना बीजो
सोमवार गा मोती बीजो जी
जद म्हारा मोती, उगण लाग्या उगण लाग्या
तीखै पानां उग आया जी
जद म्हारा मोती, सींचण लाग्या सींचण लाग्या
हिरणा गै दूध तैं सींच्या जी
जद म्हारा मोती, बडा होग्या बडा होग्या
होय गया घेर घूमेरां जी
जद म्हारा मोती, लागण लाग्या लागण लाग्या
गूच्छम गुच्छा लाग्या जी
जद म्हारा मोती, टूटण लाग्या टूटण लाग्या
गाडा भर-भर तोड़्या जी
जद म्हारा मोती, ढोवण लाग्या ढोवण लाग्या
कोठी’र कुठला भरिया जी
थाळी भरगे गजानन्द, माता धोरै ल्यायो माता धोरै ल्यायो
मोतियां गी माळा बणाद्यो जी
जे रै गजानन्द नै में, अैसी-अैसी जाणती अैसी-अैसी जाणती
सारा ही मोती दे देंवती
साधा खातर बीज्या रे माता, भगतां खातर बीज्या भगतां खातर बीज्या
तेरी तो चूंदड़ी सजाऊं जी
साधा खातर बीज्या रे माता, भगतां खातर बीज्या भगतां खातर बीज्या
साधा गो आसण सजाऊं जी
साधा खातर बीज्या रे माता, भगतां खातर बीज्या भगतां खातर बीज्या
हनुमत गो घोटियो सजाऊं जी
साधा खातर बीज्या रे माता, भगतां खातर बीज्या भगतां खातर बीज्या
किरसन गो मुकट सजाऊं जी
साधा खातर बीज्या रे माता, भगतां खातर बीज्या भगतां खातर बीज्या
सिव जी गो नांदियो सजाऊं जी।
(संदर्भ – रातीजोगै में गावण सारू भगवान गणेश रो भजन)
