सूती रंगमैल में
सूती नै आयो रे जंजाळ
भंवर म्हांनै सुपनौ बियाओ रे
सांईणा म्हांनै सुपनौ बियाओ रे
थू सुपना सभागियौ
उत्तम थारोड़ी जात
सुपना ए प्यारा
भंवर मिला दीजो रे
म्हैं सुपना थांनै मारसां
या थारी कतल करां
सुपना रे बेरी नींद गुमाई रे
ना गोरी म्हनै मारजो
ना म्हारी क़त्ल करिया
सुपनै में थांरौ भंवर मिलायो रे
सुपनै में थांरौ सांईणा मिलायो रे
थूं कुरजां म्हारै बाप री ए
थूं म्हारै धरम री बैन
कुरजां ए म्हारो
भंवर मिला दीजो ए
पर-पर लिखिया ओळंबा
चोंच लिखिया सलाम
भंवर म्हांनै सुपनौ बियाओ रे
सांईणा म्हांनै सुपनौ बियाओ रे
कुरजां उडी आधी रात नै
उडी-उडी ढळतोड़ी रात
ओ बाईसा थानै ढोले नै मिलासां ओ
मारु जी बैठ्या गोखड़े
बैठ्या सांईणा रै साथ
परवानौ ढोले री गोद में डार्यो रे
कागद ढोले री गोद में डार्यो रे
हँस-हँस बांच्या ओळंबा
लुळ-लुळ लिया सलाम
भंवर म्हांनै सुपनौ बियाओ रे
