आसाड़ै महीणै बीजां चमकै रे
घर-वर मांड्योड़ी होर
बीजां रा बालम घरै बसै
मांजो हीवड़लो होरां रे खावै रे
म्होंरा हमें बरसाळै रा बादळ
हांजी थां बिना म्हारो
चोमासौ लूंब्यौ जाए
सियाळै री खाटू भली
ऊनाळो कईजे अजमेर
नागाणो कईजे नित भलो
सावणियो कईजे बीकानेर
म्होंरा हमें बरसाळै रा बादळ
हांजी थां बिना म्हारो
चोंमासौ लूंब्यौ जाए
बरसाळो भलां आवियो रे
आभिये मों चमकी बीज
बड़ले हींडो मांडियो रे
सामण रे अैलोड़ी तीज रे
म्होंरा हमें चोमासे रा बादळ रे
हांजी थां बिना म्हारो
चोंमासौ लूंब्यौ जाए
साळ बखाणा संदड़ी
मूंगी रे मंडवर देस
झीणो रे कपड़ो माड़वे
माड़ू रे मुरधर देस
म्होंरा हमें बरसाळै रा बादळ
हांजी थां बिना म्हारो
चोंमासौ लूंब्यौ जाए
आछी पांख रो बुगलो बैठो रे
म्हां तो जाण्यो हंस
हंसलो बिचारो उड ग्यो
मूरखरियो ले ग्यो मझ रे
म्होंरा हमें बरसाळै रा बादळ
हांजी थां बिना म्हारो
चोंमासौ लूंब्यौ जाए
