भारतीय फिलम संगीत रै छेत्र में राजस्थान रै संगीतकारां रौ योगदान कोई कम नीं रैयौ है। अेक सूं अेक इधका संगीतकार दिया है राजस्थान। उणां में सूं अणूंतौ ई जसजोग अेक नांव है खेमचंद प्रकाश। धोरा धरती रौ ओ सपूत आपरी अनूठी प्रतिभा सूं भारतीय फिलम संगीत नै ऊंचायां तांई पुगायौ अर राजस्थान रौ नांव रोसन कर्यौ।
खेमचंद प्रकाश फिलम माध्यम नै अपणा’र, नीं सिरफ आपरी संगीत-कला नै जन-जन तांई पुगाई, बल्कै नवै-नवै कलाकारां नै ई इण माध्यम तांई पूगण रौ रस्तौ बतायौ। फिलम जगत रा केई नामी कलाकार उणां री देन रैया है, जिणां में संगीतकार ई है अर गायक-गायिकावां है। वे यूं तो शास्त्रीय संगीत माथै रचनावां त्यार करता, पण जरूरत मुजब लोकसंगीत रौ प्रयोग ई बौत खूबसूरती सूं करता।
आज सूं चाळीस-पचास साल पैलां री बणी फिलमां ‘तानसेन’, ‘भतृहरि’, ‘सिंदूर’, ‘जिद्दी’, ‘परदेसी’, ‘भंवरा’, ‘महल’, ‘समाज को बदल डालो’ इत्याद गीत आज ई लोगां री जबान माथै है। पुराणै जंमानै रा लोग ई नीं, आज रै जमानै री नवी पीढी रा लोग ई वां गीतां नै बडै चाव सूं सुणै। दरअसल पुराणै जमानै रा कलाकार सदाबहार रचनावां त्यार करिया करता, अच्छी चीज हर जुग में अच्छी लागै अर आ ई वजै 'क खेमचंद प्रकाश री संगीत रचनावां आज ई उत्ती ई मीठी लागै, जित्ती मीठी उण जमानै में लाग्या करती।
राजस्थान रै सुजानगढ गांव में जाया जनम्या खेमचंद प्रकाश आपरै पिता श्री गोवर्धन प्रसाद सूं ध्रुपद गायकी सीखी। आप आपरी लगन अर मैनत सूं शास्त्रीय संगीत अर कत्थक निरत मांय वेगी ई महारत हासल करली।
उणां रौ संगीत-जीवण नेपाल महाराजा रै अठै नौकरी सूं सरू हुयौ। संगीतज्ञ रै रूप में उठै आप आठ बरसां तांई नौकरी करी। बाद में फिलमां में संगीत देवण सारू कलकत्तै पूग्या। कलकत्तै री उण जमानै री नामी फिलम कंपनी ‘न्यू थियेटर्स’ मांय संगीतकार तिमिरबरन रै सहायक रै रूप में नियुक्त हुया। सरू में उणां नै 120 रुपिया म्हीनै रा मिलता जका बढता-बढता 500 रुपिया म्हीना तक पूगग्या। फिलम संगीत रै छेत्र में आ बात मानीजै क ‘न्यू थियेटर्स’ री फिलमां में सहगल रा गायोड़ा जका गीत है, उणां में ‘बालम आय बसो मोरे मन में’ (राग काफी), 'दुख के दिन अब बीतत नाही' (राग देस) इत्याद खेमचंद प्रकाश री अमर रचनावां है। कलकत्तै में ई रैवता थकां वे ‘स्ट्रीट सिंगर’ फिलम में अेक छोटी-सी हास्य भूमिका ई निभाई ही।
सन् 1931 में हिन्दी फिलम जगत रै चावै अभिनेता पृथ्वीराज कपूर रै साथै उण जमानै री नामी फिलम कंपनी ‘रणजीत मूवीटोन’ में काम करणौ सरू कर्यौ। वे सब सूं पैली फिलम ‘मेरी आंखे’ में सुतंतर रूप सूं संगीत दियौ। उणरै बाद सन 1941 रै दौरान ‘परदेसी’, ‘शादी’, ‘उम्मीद’ इत्याद फिलमां सूं घणौ नांव कमायौ। उणां री संगीत रचना में अेक गीत खुर्शीद री आवाज में ई ‘रिकार्ड’ हुयौ हौ, जकौ अणूंतौ ई चावौ हुयौ हौ। वियां खुर्शीद ओ गीत गावणौ ई नी चावती ही, पण वा उणां री लगन सूं हदभांत ई कायल हुयगी ही। इण गीत सूं खुर्शीद नै ई आछी-खासी लोकप्रियता मिली ही। सन् 1942 में बणी फिलम 'खिलौना' सूं आप चोटी रा संगीतकार बणग्या हा। इण फिलम में गीत गायक सहगल अर खुर्शीद हा। राग मेघमल्हार, राग दीपक अर राग हमीर माथै आधारित इण फिलम रा गीत उण जमानै में अेक नवौ कीरतमान थापित कर्यौ हौ। आज रा चावा संगीतकार नौशाद वां दिनां उणां रा सहायक हा। बुलो सी. रानी अर भोला श्रेष्ठ उणां रा सहायक हा।
फिलम-संगीत में जद प्रादेशिक संगीत अर गीता रौ चलण नीं हौ, तद खेमचंद प्रकाश राजस्थानी लोकधुनां रौ वर्चस्व कायम कर्यौ। ‘भतृहरि’ फिलम में सहगल अर खुर्शीद सूं आप जित्ता गीत गवाया, उणां में राजस्थानी संगीत री खुसबू ही।
आप दूजी फिलम-निरमाण संस्थावां सारू काम कम ई कर्या हा। ‘प्रकाश पिक्चर्स’ री ‘समाज को बदल डालो’ अर ‘फिल्मीस्तान’ री फिल्म ‘सिंदूर’ खेमचंद प्रकाश रै संगीत रै बळ माथै घणी चाली। बाद में वे ‘रणजीत मूवीटोन’ छोड’र सुतंतर संगीत निरदेसन करण लाग्या।
खेमचंद प्रकाश नवी-नवी प्रतिभावां रा सच्चा पारखी हा। संगीतकार अनिल विश्वास रै माध्यम सूं लता मंगेशकर सूं भेंट हुई अर फौरन उणरी प्रतिभा नै पिछाणग्या। निरमातावां री नापसंदगी रै बावजूद आप लता नै ‘जिद्दी’ फिलम में गीत ‘चंदा, जा रे जा’ गवायौ, जकौ 'क राजस्थानी लोक धुन ‘कागा, जा रे जा’ माथै आधारित हौ। इण फिलम सूं लता मंगेशकर रौ भविस बण्यौ।
उण जमानै में संघर्षरत गायक अर अभिनेता किशोरकुमार नै खेमचंद प्रकाश ई चमकायौ हौ, फिलम ‘जिद्दी’ सूं। किशोर कुमार री आवाज में 'मेरी चांदनी बिछड़ गई, मेरा घर उजड़ गया' गीत गवायौ। इण गीत रै पंदरै दिनां बाद ई आपरी जोड़ायत रौ देहांत हुयग्यौ। दरदीली रागां रौ ओ संगीतज्ञ दरद में डूबग्यौ।
उण जमानै में उणां रै कनै ‘रिमझिम’ ‘सावन आया रे’, ‘महल’ जिसी केई फिलमां ही। कोई पचीसे'क फिलमां में संगीत दियौ। ‘गुरुजी’ रै नांव सूं वे हंसमुख अर मस्तमौला आदमी मानीजता। ‘रणजीत मूवीटोन’ में अेक हजार अर ‘बांबे टाकीज’ में डेढ़ हजार रुपिया मिलता।
अेक बार स्वर-सम्राज्ञी लता मंगेशकर खेमचंद प्रकाश रै बारै में बतायौ 'क “खेमचंदजी सूं म्हारौ रिस्तौ दोस्ती री हौ। वे इंसान रै रूप में फरिस्ता हा। फिलम में शास्त्रीय अर राजस्थान लोक संगीत रा आदि पुरुष हा। मारवाड़ उणां रै खून में हौ। वे खुद ई चोखा गायक हा। ठुमरी अर गजल माथै उणां रौ पूरौ अधिकार हौ।”
लता मंगेशकर उणां रै संगीत-निरदेसन में ‘आशा’, ‘जिद्दी’ अर ‘महान’ फिलमां में गीत गाया।
‘बांबे टाकीज’ री फिलम ‘महल’ उणां री आखरी फिलम ही। कमाल अमरोही उणां रै दरदीलै संगीत में मरसिया अर नौहा सोधता। आ बात जगचावी है क उणां रै अमर गीत रौ मुखड़ौ ‘आएगा, आएगा, आएगा! आने वाला आएगा' लिख्यौ। फिलम ‘महल’ रा गीत 10-12 साजां में ई रिकाई हुया हा। जद ‘महल’ रिलीज हुई तो च्यारूंमेर उणां रै संगीत री चरचा ही। पण दुरभाग सूं आपरी महान रचनावां वाळी इण फिलम नै वे खुद देख नी सक्या। ‘महल’ रै प्रदरसण सूं कोई दो म्हीनां पैली 10 अगस्त 1950 नै वे इण दुनिया सूं व्हीर हुयग्या। उणां री कला साधना सूं फिलम संगीत सदीव ऋणी रैसी, अर ऋणी रैसी के वे आपरै लारै संगीत सम्राट नौशाद, स्वर सम्राज्ञी लता मंगेशकर अर अनूठा गायक किशोरकुमार जैड़ी प्रतिभावां देयग्या।