हूंफा सांदू
पंदरवी सदी रा डिंगल गीतकार। जलम मेवाड़ में पण कर्मभूमि मारवाड़ अर माड़। घणकरी रचनांवा अणछपी।
पंदरवी सदी रा डिंगल गीतकार। जलम मेवाड़ में पण कर्मभूमि मारवाड़ अर माड़। घणकरी रचनांवा अणछपी।
जिकै कवि आपरी कालजयी रचनावां रै पाण लोककंठां में आज ई अमर है, उणां में हूंफा/हूंफकरण सांदू रो नाम चावो-ठावो है। पण छपी पोथ्यां में हूंफा सांदू री ओळखाण अल्प ई मिळै।
पंदरहवीं सदी रै डिंगल गीतकारां में हूंफा/हूंफकरण सांदू रो नाम चावो है।
मूलतः मेवाड़ में जलम्या हूंफकरण सांदू ने खींवसर शासक खींवसी मांगळिया खूंडाला गांव इनायत कियो। जद खींवसी आपरी बेटी जैसलमेर शासक रावळ दूदा नै परणाई जद उण कुंवरी आपरै बाप खींवसी सूं अरज कर'र हूंफकरण सांदू स्थाई रूप सूं जैसलमेर लेयगी। जठै रावळ दूदा उणांनै सांदुवां गांव इनायत कियो।
जैसलमेर रा रावळ दूदा रै प्रिय कवि अर सभासद रै रूप में हूंफा रो नाम हरोळ है।
ख्यातां में उल्लेख आवै कै उणां रै शब्द सौष्ठव माथै रीझर एक'र तो दूदा रो कट्यो सिर ई वाह! वाह! कर उठ्यो।
किंवदंती चालै कै जद तत्कालीन दिल्ली पातसाह साथै हुई लड़ाई में दूदा वीरगति वरी। उण बखत दूदा री राणी मांगळियाणी जद रावळ रो सुरग तक साथ करण री तेवड़ी तो रावळ माथो लावण रो जिम्मो हूंफा सांदू नै सूंप्यो।
हूंफा री वाकशक्ति सूं पातसाह तो रीझ्यो ई कट्यै सिर में ई जोस संचरियो। इण बात री साख भरतो हूंफा रो उवो गीत घणो चावो है। जिणनै ख्यातकार नैणसी संदर्भ रै रूप में दियो है। इण बात री ताईद जोधपुर महाराजा मानसिंहजी ई भरी है-
सांदू हूंफै सेवियो, साहब दुरजनसल्ल।
विड़छां माथो बोलियो, दूहां गीतां गल्ल॥