पपइया रे! पिव की वाणि न बोल
सुणि पावैगी विरहिणी रे थारी राळैगी पांख मरोड़
चांच कटाऊं पपइया रे, ऊपरि कालर लूण
पिव मेरा मैं पीव की रे, तू पिव कहै स कूण
थारा सबद सुहावणा रे, जो पिव-मेळा आज
चांच मढाऊं थारी सोवनी रे, तूं मेरे सिरताज
प्रीतम कूं पतियां लिखूं, कउवा! तूं ले जाइ
जाइ प्रीतमजी सूं यूं कहै रे, थारीं विरहणि धान न खाइ
मीरां दासी व्याकुळी रे, पिव-पिव करत विहाइ
वेगि मिलो प्रभु अंतरजामी! तुम विन रह्योइ न जाइ