A collection of folk songs such as devotional songs, seasonal songs, love songs, festival songs etc.
‘हळदी रो रंग सुरंग’ हळदी रो गीत, सारंगवास गाँव, सोजत सिटी, मारवाड़
विवरण
राजस्थान में ब्याव सूं जुड़्योड़ी न्यारी-न्यारी रीत-रिवाजां है अर उणां रा न्यारा-न्यारा ही गीत है। ब्याव सूं केई दिन पैली बिनायक (बान) बेठाणैं वाळै दिन बन्नै अर बन्नी नै पाट माथै बेठाणैं री रस्म है। बन्नै-बन्नी नै पाट माथै बेठाणैं री इण सुभ वेळा माथै पाट दस्तूर रै गीतां साथै ओ गीत भी गायो जावै। इण दिन सूं लेय'र ब्याव वाळै दिन तक रोजीना बन्नै अर बन्नी रै पीठी भी लगाई जावै। ईं गीत रा बोल इण भांत है-
म्हांरी हळ्दी रो रंग सुरंग, निपजै माळवै हळ्दी मोल पसारी री हाट, वनड़ै रे सिर चढ़ै चिरजीवो रायजादो रा बाबोजी चतुरसुजान हळ्दी मोलावै बां री माता रे मन कोड घणा करै म्हांरी हळ्दी रो रंग सुरंग,निपजै माळवै हळ्दी मोल पसारी री हाट, वनड़ै रे सिर चढ़ै चिरजीवो रायजादो रा काकाजी चतुरसुजान हळ्दी मोलावै बां री काक्यां रै मन कोड घणा करै म्हांरी हळ्दी रो रंग सुरंग, निपजै माळवै हळ्दी मोल पसारी री हाट,वनड़ै रे सिर चढ़ै चिरजीवो रायजादो रा मामोजी चतुरसुजान हळ्दी मोलावै बां री माम्यां रै मन कोड घणा करै म्हांरी हळ्दी रो रंग सुरंग, निपजै माळवै हळ्दी मोल पसारी री हाट,वनड़ै रे सिर चढ़ै चिरजीवो रायजादो रा वीरोजी चतुरसुजान हळ्दी मोलावै बां री भाभ्यां रै मन कोड घणा करै म्हांरी हळ्दी रो रंग सुरंग, निपजै माळवै।
