म्हारै ऑफिस आवण सूं पैलां
म्हारी जोड़ायत
थोड़ी देर बांचै अखबार री सुर्खियां
अर पछै सोवणी तरियां
अंवेर अखबारां नै
कमर कस आपरी चूंदड़ी सूं
जुटज्यै घर रा कामां मांय।
कलेवै रा जूंठा बरतन
राखै बेसिन मांय
आलो तोलियो तणी पर
अर मैला गाभा घालै
वाशिंग मांय।
बेटी रै कमरै मांय
कतरणी सूं काट’र फेंक्योड़ा पाना
इन्नै-बिन्नै बिखर्योड़ा रामतिया
उथळ-पुथळ पड़ी चप्पल-जराबां नैं
धरै सावळ सही ठोड़
मन मांय मुळकती-सी।
किचन मांय रसोइयै री मदद सूं
पकावै खाणो
अर टिफिन मांय घाल’र भैजै
म्हारै ऑफिस।
पछै उडीकै बेटी नैं
स्कूल सूं आया पछै
कपड़ा बदळवाय’र
बींरै साथै रोट्यां जीमती सुणै
बींरी भोळी-भोळी
निरमळ-निरमळ बातां–
‘मां, आज म्हानैं ‘गुड’ मिल्यो’,
‘मैडमजी, घणा आच्छा है
भणावै घणै हेत सूं’
अर फलाणती छोरी बोली इयां
धीकड़ती बियां
बतावै अेक-अेक बात।
म्हनैं कठै ओसाण
बेटी री आं बातां सारू।
पछै सुलाय’र बीं नैं
धुप्योड़ै गाभां
पैंट-बुरसट सूं लेय’र
बेटी रै टिफिन क्लॉथस तक
करै प्रेस
राशन रै हिसाब सूं लेय’र
माळी नैं नवां पौधा लगावण
अर खरपतवार हटावण रो कैवण तांई
भाजती रैवै
घर रै अेक कूणै सूं दूजै तांई
मसीन-सी।
ना जाणै कद बखत काढ’र
म्हारै कानी सूं दे देवै
रिस्तैदारां नै मोकैसर बधाई
का बांटै बां रो दुःख
पी’र-सासरै सूं कर लेवै
घरबिद री बातां
पछै उडीकै म्हनैं।
म्हैं नीं जाणूं
घर सूं दफ्तर
अर दफ्तर सूं घर
लोगां रा कामां खातर
कित्तो घूमूं अर फिरूं।
जाणूं तो बस आ कै
इण बिचाळै
म्हारी जोड़ायत
घूम ल्यै बेटी साथै
आपरै बाळपण मांय
अर बीजै कामां बीच
खयालां मांय आखी दुनिया
जीसी बण्योड़ी ही
अपणां सूं
सपणां सूं!!
