ओ तूफांन उठैला अणचेत्यो
गांव गांव में नगर नगर सूं
आंख्या सूं अगनी बरसाती
फड़काती भुजदंड रुधिर सूं
ओ विकराळ भयंकर काळरूप
महाकाळ कोड़ो ई घर सूं
सांपरतेक घणजांण अणूतौ
बादीलौ बेताळ अलेखूं झूपड़ियां सूं
खेत जावै अधबिखरी ढाण्यां
मोटी मीलां री छोटी कोटड़ियां सूं
आकळ बाकळ बरसां बिलखी
अलख जगाती अलूणी आंखड़ियां सूं
नित सोसण री अणमाप सताई
भूखी तिरसी अणदीठी आंतड़ियां सूं
मुगत हवेला छिप्योड़ी सांसां
जुगा जून अंतस रे डर सूं
ओ तूफान उठेला अणचेत्यौ
गांव गांव नै नगर नगर सूं
आख्यां सूं अगनी बरसातो
फड़काती भुजदंड रुधिर सूं
ओ विकराळ भयंकर काळरूप
महाकाळ कोड़ा ई घर सूं
काळजिये री धुकण सुळगती सांसां
खेह चढ़ेला अम्बर सगळौ डकजाई
फूटैलौ दब्योड़ो धरती रौ लोहौ
राचैला रंग सुरंगी चौफेर ललाई
उफणैला नैणां सूं सात समंदर
दरसैला आंधां नै कुदरत री सबळाई
जागैला जोत रुंख रूंख जुद्ध करेला
टणकां री मापीजैला टणकाई
रोकैला कुण वेग प्रचंड बवंडर रो
देखो कुण झगड़ैला सबळ सिकंदर सूं
ओ तूफान उठैला अणचेत्यो आंख्यां सूं
गांव गांव नै नगर नगर सूं
आंख्या सूं अगनी बरसातौ
फड़काती भुजदंड रुधिर सूं
ओ विकराळ भयंकर काळरूप
महाकाळ कोड़ां ई घर सूं
संकाळू सरवरियां री पाळ फूटगी
इच्छाव पांगरता ई मांदी पड़गी
धीजै रो अणमोल खजांनो किया सांवटै
सांसां रे कोथळिये तीबां जड़गी
सपना री चकरी चढ धूमै सिंघासण
पण परजा री गाडी आधेटै अड़गी
रूंखां ने नागा कर दीन्ही पुरवाई
रुत आवण सूं पेला मिमझर झड़गी
भाटा रा भगवान कठा लग पूंजा
सिरैपोत छिड़े लड़ाई मिन्दर सूं
ओ तूफान उठेला अणचेत्यौ
गांव गांव नै नगर नगर सूं
आंख्यां सूं अगनी बरसातो
फड़काती भुजदंड रुधिर सूं
ओ विकराळ भयंकर काळरूप
महाकाळ कोड़ां ई घर सूं...
