इयां दिनां
बार-बार
आय रैयी है
हिचकियां
अटक जावै
गळै में पाणी
खांसतौ रैवूं
खासी ताळ
चितारू थांरी बात
कैया करती ही-
थूं
जद-जद आवै हिचकी
पाणी अटकै
तो समझ लिया
म्हैं याद करूं हूँ
थानै...
पण... पण...थूं तो
घणी अळगी गई परी
म्हैं सूं
कै
थारी याद तक ई नीं पूग सकै
म्हारै तक-
फेर भी चावूं हूँ
हिचकियां आवती रैवे
पाणी अटकतौ रैवे
म्हैं खांसतौ रैवूं
चावै
दम फूलै
चावै
प्राण निसरै
क्यों कै
थारी ओळू
म्हनै
प्राणां सूं घणी प्यारी है।
