बो म्हनै झूठे बिस्वास म राख्यों
घणै टेम स्यूं मोटी आस म राख्यों
म्हारे मिनख पणै सूं मुंडों फेर'र
बो तो चम्मचा नै पास म राख्यों
म्हनै काळो कुरूप जोकर बणाय
बो आपो आपनै ताश म राख्यों
म्हारी आवाज नै हर टैम दबायों
आखी उमर म्हनै लाश म राख्यों
म्हारे पुरखा रा नाव निसाण मैट
आपो आपनै इतिहास म राख्यों
मीठा-मीठा बोल-बोल'र लुभायौ
पण सांची कैवूं खटास म राख्यों
म्हारा सगळा पंख पखरू खोस'र
आपो आपनै आकाश म राख्यों
आंखड़ल्यां जद जबाब देण लागी
'निर्मोही' पगा ने बो घास म राख्यों
