कळी फूल में रूप बदळगी
भंवरी री सै बात समझगी
देखौ रुत रौ अेक अचंभौ-
दोबड़ी दरखत होगी रे
बीज में बरकत होगी रे
नुगरौ पवन कुचरणीगारौ
हर भौंके छेड़ै उणियारौ
सांसां रे संग जा सामेळै-
सरबरा सरबत होगी रे
बीज में बरकत होगी रे
तन री तिरस जेठ री धरती
जुगां जुगां सूं रैगो परती
मीत मिळण री बेळ सुबेळा-
उमर ही तरपत होगी रे
बीज में बरकत होगी रे
मूंघौ है पण हंस बतळाणौ
लोगां रे बिच कुबद कमाणौ
देखो जग री अबखो बांणी-
कांकरी परबत होगी रे
बीज में बरकत होगी रे
