दिसंबर री सीळी रेत में
खेत रै टिब्बै पसर्यो हूं रिंकी
अर थांरी सांसां रौ निंवाच है
भाखपाट्यै सूं लावणी रै लाग्यौ
भूख अर तिरस सूं बेकळ
म्हैं थारै सिर धरयै बट्ठळ मांय देखूं झांक 'न
जेठ री दोफारी री लाय मांय बळतौ म्हैं
अर खेत रै कुंड कनलै नीम री
जाडी-सीळी छींया बणनै थूं छायगी है म्हां ऊपर
धूजती दिनुगाळी मांय
चिड़कल्यां सूं भरयै डागळै आयनै बैठ्यौ हूं
अर थूं तावड़ियौ बणनै म्हारै डील सूं लिपटगी है
बगत इण भांत चूम रैयौ है आपां नै
कै थारै होंठा रै हरेक परस सूं
भाल हुवती जावै डील अर आतमा री हरेक झरींट
जिंदगांणी कोई फिल्म नीं है रिंकी
पण म्हैं फिल्मां री भांत
बादळां मांय कठैई उड्यौ जावूं
अर सुण!
म्हारी बांथ मांय थूं है रिंकी, थूं!
