आखी उमर खटै
जीणै खातर
अर सांस रै सागै
आपरै सुपना री
झीणी तांतां बटै
जलमै अर जूझै
इण जूण सूं
मुगती सारू किणनै बूझै?
निगै आय जावै
अैड़ा घणाई चैरा
पण जद हुवां
साव अेकला
आवां जद खुद रै सामी
अणचाई चीजां सूं
कुण आफलै,
लोग लुकाय लेवै
माळीपानां रै लारै
आपरा उणियारा
अठै केई सवाल
टाळीजै पाछल पीढी रै नांव।
कठीनै जावण लागी
म्हारी पीढी
तर-तर पड़तै
इण आंतरै नै
बताव कीकर परखां
कीं चीजां है
नुंवी कूंपलां रै उणियार
गमला में उगती
पसरावती आपरी जंड़ा
मुगती सारू जुझै
बोल वांनै कीकर निरखां?
