रूंखां जळ है
रूंखां फळ है
रूंख हवा है
रूंख दवा है
रूंख आज है
रूंखां कल है।
रूंखां सूं
धरती रा रंग है
रूंख बिना
सै रुत बेरंग है।
धरती रो
सिणगार रूंख है
जंगळ रो
आधार रूंख है।
पंखेरू रो
घर-बार रूंख है
जिनावरां रो
संसार रूंख है।
रूंखां सूं ई
हरियाळी है
रूंखां सूं ई
खुशहाली है।
रूंख बिना
धरती सूनी है
रूंख बिना
बदहाली है।
रूंख बिना
बादळ नीं बरसै
सूखी धरती
मेह नै तरसै।
रूंखां सूं ई
हवा साफ है
रूंख काटणो
महापाप है।
