रम रै उबाळ में अलमस्त हो
नत्थूड़ो
गन्नै रै खेत सूं निकळनै
गांव कानी चाल्यो
कोसतो
डांवाडोल गळयां
झूमता पेड़ां नैं
तारां सूं मारग पूछतो
पण तारा टिमटिमाण में
बिसर रैया है
गांव-गुवाड़ रा
पियक्कड़ टाबरां रा
बेसार सवालां सूं
वै खोपड़ौ नीं उळझावै
ईं ऊंधी-सूंधी रात राम में रुळग्यो
सुपनै रा आला गूदड़ां
छप-छप करतो
फेर जाग्यो
चांद थोबड़ो बाए
बीं रै कानां में उतारै हो
पोठै अर बिरखां रो घोळ
नेह री दांई।
अेक बावळी डोकरी पर
रोड़ रै दोन्यूं साइड सूं
बिजळी रा खंभा
पीळो च्यानणो मूतै
चीन्है सै छपरियै आगै
मूंडो काढनै
टूंडा हाथ हिलावै
पोपळी मुळकै
टैण रै पींपै जिसी पोली रात में
कळपेड़ा हुजूस ओळखै
इन्नै कोई नीवड़ेड़ा
चूचियां आळी कुतड़ी
जिण रा तीन कुकरिया सिंझ्या नैं
कुत्तां सरदारां री झड़प में मरग्या
आपरी अेकली मोभ री
संतान नैं लेयनै भाजी आवै
छपरियै कानी शरणां
कीच में लोटता दारूड़ियै कानी झांकती
साढै नौ आळी
आखरी बस खैंखाट करती
तीनां पर कीच-धूड़ उळीचती गई
अर अै तीनूं बैठया है
रम, खुसी अर ममत्व री गरमी मे
जकड़ीज्योड़ा ठंडी निठुर रात में।
