केई मारग व्है अदीठ
अदीठ सूं अदीठ ठौड़ जावता
अदीठ मारगू चालै आं माथै
हाथ पग अर डील बायरा मारगू
सुण्यौ हौ
सुणा हां
के अजतांणी केई तंत्राळू
आपरै खूंजा ताळकै कर्योड़ा राखै
अैड़ा मारग
वगत-वगत पै
काढै
अर लप्प देणी रा झिलाय दे
गिराकां नै
धकै खोटमाळी व्हैजा
कन कोई तौ मारग हालतो-हालतो ढबजा
तौ धकला रा भाग
असल में भाग-जोग रा मारग
व्है इज अैड़ा
जिणनै हरमेस भाग पूटया मोलावै
त्र्प्रापरा हिया फूटया साइना नै
दियावळा दोड़ावण खातर
औ मारगां री मंडी कठै
कुण आंरा आड़तिया
नीं बतावणौ सावळ
कवि धरमभिस्ट व्है जावै
पाठकां नै भरमाबतौ
पण
कविता रै मन में सोराई बापरै
इण सूं
के कोई सोजीवांन पाठक
खुद रा कळाप सूं खोज काढ
कदैई आंरा पग नीं काढै आं मारगां
दीखता-दाख़ता मारग
मर जायां करै नीं वापरण सूं
कन मरे
भूकंप
बाढ
अगन रै परकोप
कदै कदास ध्रोब सूं
पण अै अदीठ मारग
कांई करयां मरै
आवौ अपां जीवता हां जित्तै सोचां
नींतर अपांरै मरतां ई
अमर व्है जावैला
अै अदीठ मारग!
