उळझती गई
नागण सा बळ खायोड़ा
कांमणी रा केसां में,
मसळीजी मैंदी रचिया हाथां सूं,
दूर बैठी देसां में
मिरगानैणी रै दाड़म-सा दांतां बिचाळै
किचरीजती रैयी कविता।
पिरती गई
भालां री अणियां में
ढालां री कणियां में
गोळां री गड़गड़
तोपां री तड़तड़ सूं
बोळी होय’र
वीरां री नळियां सूं
जुद्धां री गळियां में
गमती गई
बिषकन्या बण कविता।
लिटती रैयी
हरजी रै चरणां में
च्यारूं वरणां में
चढती गई मिंदर री पैड़ी
देवळ री मैड़ी
कासी री वासी
देवां री दासी बण
आंख्यां सूं आंसूड़ा
ढळकांवती रैयी कविता।
सिकती गई
लू री लपटां में
आंधी रा झपटां में
उडती गई
दबगी दळ-बादळां बिचाळै
भींजी मेह री मिमझर में
बसंत रुत सूं पैलां
रूंखां रै पांनड़ां ज्यूं
झड़ती रैयी कविता।
कवियां री किलोळ
रागां री रिमझोळ सूं
कंठां तांई कायी व्है
छंदां री छौळ में डूबगी कविता
मुगत होयगी
कलम रा धणियां
मुरधर रा मणियां
अर हठ पकड़्यै हाथां सूं।
ऊपजी अनुभव रै आखरां
भावां रै भाखरां उतरी
मांनखै रै मन री थाह लेवण नै
देवण नै थथोबौ
दुनियां रै दादखै सूं
दुखी मन रै दरद नैं
मरद बणावण रै मिस
पाछी जलमी कविता।
गांव रौ पीपळ गट्टौ
गांव री चैपाळ
चैपाळ बिचाळै पीपळ गट्टौ
जिण माथै बैठै मिनख
मिनख?
हां मिनख!
कीं जोगा, कीं नाजोगा ई
पण सगळां नै है छूट
पीपळ गट्टै माथै बैठण री
बंध्योड़ा सगळा आप-आपरी
मान-मरजाद सूं
क्यूंकै
गट्टौ चैपाळ रौ है
चैपाळ आखै गांव री है
अर गांव सगळां रौ
इण सारू
सगळा ई करै बैठ’र
आपसरी में हथाई
बीच-बिचाळै करै हंसी-ठट्ठौ ई
हंगी-मूती बातां सूं लेय’र
हुवै है बातां तीजै जगतजुद्ध री ई
सगळां री सुणै पीपळ गट्टौ
पण साव अबोलौ है वौ
सगळा उण माथै बैठै
पण अेकदम अेकलौ है वौ
कोई गिट जावै भलांईं
आपरै होठां आयोड़ी
कोठै मांयली बात
पण पीपळ गट्टै सूं
अछानी कोनी कोई बात!
