ओळूं नित रमती रैवै मन रै आंगणियै
बरसां बरस री बातां
आतां अर जातां
सांमी आय'र हरमेस कैवै।
मन रै आभै तांई पूगै
ओळूं रा रंग
सांमी आवै नवा दरसाव,
रंगीजै म्हारा दिनड़ा
अर सगळी रांता
ओळूं नीं देवै
अजै ई कोई नै दाव।
भलांई बीतग्या कितरा ई बरस
कै बीतगी जूंणा
आ म्हारी जलमां री जातरा
अजै ई रमती रैवै
म्हारी ओळूं रै आंगणिये
मिटै नीं अजलग
म्हारी ओळूं री आ तिरस।
वा धोरां री सोवणी धरा
वै घेरघुमेर बड़ला
तलाव री वै पाळां,
कांई कांई याद करां
अर कांई कांई टाळां,
आ म्हारै बस में कोनी
ओळूं रै आंगणियै
रमै अर लटूंबै
हरियल रूंखां री डाळां।
