नीं तो कोई नक्सौ
अर नीं कुतुबनुमा
पण फेरूं ई
साईबेरिया सूं बईर हुयोड़ा पंछीड़ा
पंखा रै पतियारै
अर हिम्मत रै पाण
केवलादेव पूग ई जावै
नीं तो भटकै अर नीं कठैई अटकै
कित्तो भरोसो है वां नैं
आपरै सुभाविक ग्यान माथै।
इणी तरै नदी, नदी नै ई
आपरै ठोड़-ठिकाणै रो ग्यान है
मारग री विगत नै
वा ई पिछाणै, जाणै कै
भाखरां री छाती नैं चीर’र
मैदानां में बैंवती-बैंवती
उणनै गंगोत्री सूं लेय’र
गंगासागर तांई पूगणो है
बगतसर ढूकणो है।
कुदरत रै हाथां री ओळयां
यूं ई नीं मंडीजै
वां नैं आपरी मरजादा में
रैवणौ पड़ै है
नदी री तरियां बैवणो पड़ै है।
