बीनती सुणी नीं म्हारी मुरधर माय, थोड़ी दया चित्त लाय।
दुखियां री बिखायतां री करजो थे सहाय, म्हारी मुरधर माय।
धानड़ौ निपजावां म्हें तो डील नै सुखाय
सर तोड़ा टाबरियां तांई करां हाय-हाय, म्हारी मुरधर माय।
सियाळै ऊनाळै राखां मन में हुळास,
छणी बावां बिणिया बीणां मोकळौ कपास, म्हारी मुरधर माय।
तोई फाटा चींथरा सूं गुजारौ करां,
ठंड में ठरठरता बिना मौत ही मरां, म्हारी मुरधर माय।
ठीकरा अडाणा बाजां घर रा धणी,
भूखां मरतां आख्यां धंसगी टाबरियां तणी, म्हारी मुरधर माय।
सोना हंदी चिड़ियां सूं सूनौ हुयग्यो देस,
बाणियै रै भोग लावै करसा हंदा केस, म्हारी मुरधर माय।
घर री धिराण्यां नै मिलै नहीं चीर,
फाटगा घाबलिया राळ्यां होगी लीरां लीर, म्हारी मुरधर माय।
सेठ जी लगायौ नहीं हळवाणी रै हाथ,
सेठाणीजी बारै निकळै सेज-गाड़ियां साथ, म्हारी मुरधर माय।’
