मोटर निकळगी कनै सूं,
लारै उडती रैगी धूड़।
कोनी मिल्या सफर रा साथी,
रैग्या पगल्या पीट।
कांधा झुकग्या घणै बोझ सूं,
म्हे नींव री ईंट।
कोर कंगूरा काढ-काढ नै
सजग्या महल मा’ळिया,
अँधारै में फस’र हुयगी
म्हां री जवानी कूड़।
म्हां रै मन री बातां बांनै,
बेरो नीं कुण कैग्यो।
चालण रो जद हुयो महूरत,
इस्यौ बायरो बैग्यो!
साँप-संपोळा निकळ बिलां सूं
म्हां री चाल रोकणै खातर
पगां चढ़ाई चूड़।
चणा मिल्या तो जाड़ टूटगी,
जिन्दगी रो खत कोरो।
गळी-गळी में फिरा ढूंढता,
गोदी में हो छोरो।
सांसां रो पड़ब्याज फळावण
सेठ आँगणै बैठ्यो
बै ई फसल उठासी अब तो
म्हे काट्यो हो सूड़।
मोटर निकळगी कनै सूं
लारै उडती रैगी धूड़।
