चालो नूंवो इतिहास बणावां
मायड़ भासा रो माण बधावां
भाषा बिना ना बात बणैली
दुनियां थांनै कांई कैवैली
लिखणो है मायड़ में पैली
राजस्थान री शान बधावां
चालो नूंवो इतिहास बणावां
मायड़ भासा रो माण बधावां
राणा रो अभिमान इणी सूं
पन्ना रो बलिदान इणी सूं
मीरां रो है मान इणी सूं
इण सूं ई अब कलम सजावां
चालो नूंवो इतिहास बणावां
मायड़ भासा रो माण बधावां
सूरां री वाणी री साणी
नरसी री भी अजब कहाणी
मरवण इणसूं गई पिछाणी
धोरां री धरती महकावां
चालो नूंवो इतिहास बणावां
मायड़ भासा रो माण बधावा
लाळस रो ईं में सबदकोस है
मीसण कह दी सन सत्तावन
आढा रो चूंगटियो चेतावन
क्यूं तपस्या आंरी व्यर्थ गमावां
चालो नूंवो इतिहास बणावां
मायड़ भासा रो माण बधावां
भासा बिना के राजस्थान
लागै बिन देवळ रो थान
परभासा रो कांई गुमान
खोयो माण पाछो ले आवां
चालो नूंवो इतिहास बणावां
मायड़ भासा रो माण बधावां
भासा बिना पिछाण अधूरी
भासा ई बा पैली धूरी
रैगी इण बिन कसर अधूरी
आओ सगळा सूची में ल्यावां
चालो नूंवो इतिहास बणावां
मायड़ भासा रो माण बधावां
कांई मचा राखी रै भैळ
मंत्री जी क्यूं राख्या पेल
इब आं तिलां में कोनी तेल
आर-पार री जुगत लगावां
चालो नूंवो इतिहास बणावां
मायड़ भासा रो माण बधावां
