अेक
कांई हुयो दिल्ली!
थूं कांई बावळी हुयगी?
आखै दिन–आखी रात
हांफती रैवै
अर भागती रैवै
थम!
कदैई तो थम
जी कदैई थूं
आपरै खातर ई
देख, दुस्मणां रै
पगां रा खोज थारी छाती माथै
मंड्योड़ा है
कितरा घाव होयग्या थारै डील माथै
पण थूं है कै अेक रल नीं रुकै
कांई ठाह किणरै खातर भागती रैवै
आपरै दुख नैं भूल’र
थूं बावळी दिल्ली!
दोय
बगत रै रचियोड़ै इतियास रा पाना
जद कदैई उथळूं
म्हनैं हर पानै माथै दीखै तो बस
हंसती दिल्ली
रोंवती दिल्ली
बिल-बिलांवती दिल्ली
ठाह नीं दिल्ली मांय
कितरी’क
दिल्लियां और रैवै है
सगळां नैं लुभावै है
बुलावै है
सुपनां में आवै है
कैवणिया कैवै
लाल किलै आळी दिल्ली
फलाणी दिल्ली
पण सोचतां कदैई नीं देखी दिल्ली नैं
राजघाट रै होवतां
इतरो हाको क्यूं करै
आ दिल्ली!
