मिनखां में दानवता बड़गी, मानवता कोड़ै लुखगी।
अखबारां में छपै उघाड़ी, तांडवता जग मे फिरगी।
भायां रे बीच बैर बध्यो, दुसमण ज्यूं बैवार करै।
हेत हबोळा कद ही सूख्या, बैरभाव गरदां चढगी।
दीन दुखी नै झट दुत्कारे, ओछापण नै धार लियो।
आज विकास री आड़ भायलां, बातां सैं रेतां रूळगी।
गरज पड़्यां म्हे बाप बणांल्यां, गरदभ रा पगल्यां पूजां।
अपणायत रा झूंठा पड़दा, काठ पूतळ्यां कद घड़गी।
जीव जिनावर घणां निभावै, हेत प्रीत रा नातां नै।
मिनखां में तो स्यार लूंकड़ा मानवता जीवां बड़गी।
कदै कदै बा पाठ पढावण, मिनखपणो दरसा ज्यावै।
बाकी सगळो कुओ भांग रो, 'भावुक' बण झांटी झड़गी।
पोथ्यां रा पाना री ओळ्यां, कदै कदै समझा ज्यावै।
दानवता नै मार मानखा, मानवता बातां कथगी
