सोनल धोरां रै
गलीचां माथै
डूंगरां रो तकियो लगायां
खिलखिल हांसै
म्हारो गाँव।
चानणी रातां
कबड्डी पाळो कै पछै
सतोळियो रमतां
लूणक्यारो
गेडियो खेलतां
घणो ओपतो लागै
म्हारो गाँव।
गांवाई बेरै री
चरड़—चूं
खामीड़ै री खळखळाट
ढीली देवता
पाणत करता हाथ
लागै ओपता।
खेतां री रामभणत
सूड़ करता करसा
बूझा काटता मरद
गोबर थापती
नाजकड़्यां
गावै हिळमिल।
होळी दिवाळी
चोखा गीत उगेरती
मावल्यां धोकती
रातीजोगा
झडूला
भैरूं बाबै री जात
चैत में गणगोर्यां पूजती
सुरंगा सावण गाती
अठै रेवै जागतो
बारूं मास
म्हारो गाँव।
मझ सीयाळै
घूघी ओढ्यां
दाव चराता नानकड़ा
होको गुड़गुडावता मोट्यार
बीड्यां सूटता
अलगोजा बजाता
नाचता करसा
तेजै री टीप सारता
निनाण करता
रेत मांय रमता
अणमोला हीरा।
घमड़—घमड़
दही बिलोवती
धिराण्यां
छाछ—राबड़ी
सबड़ता
मोट्यार
चूंटियो चाटता
करसणी
घणा निरोगा
सरावणजोगा।
ओ म्हारो गांव
जाणै सुरग तणो
कुदरत रो
अणमांग्यो
वरदान
जठै
आतमा’र परमातमा रो
थिर वासो।
