मा
आपां नै
किंयां पाळ्या पोस्या?
आपां नीं देख्यो
कित्ती दो'री हुई हुवैला मा..!
ओ चितराम
देखणो हुवै तो देखो
चिड़ी रै आळै में
बैठ्या चिड़ियां नै।
चिड़ी, मा
किंयां चांचां सूं
चुगावै चूण,
छोटी सी चूसटी
किंयां पाळै चिंनां-चिंनां
फोइयां नै!
कुतड़ी मा किंयां पाळै
आपरै घुचरियां नै अर
बिलड़ी किंयां
चक्यां फिरै दांता में
आपरै बचियां नै...
सूरड़ी ई पाळै सागै ई
दसे'क नै सावचेती सूं
ईयां ई जगती री
मांवां नै देख्यां पछै
कोई किंयां केय सकै कै
मा सू मोटो हुवै
भगवान, अल्ला, ईसा, वाहेगुरू!
जद कै
सगळा रो जीवण
हुवै मा सूं ई सरू।
