उठ सुहागण सांवळी
कुळ बहू आई घर मांय
सोना रो सूरज ऊगियो जी।
फूलां सूं चौक संवारयां
मोत्यां री बांदरवळ
बहू नै सांमी लेवां जी।
ढोली तो ढोल बजायसी
नगदल रोकैली द्वार
बाई नै नेग चुकावां जी।
नगर बधाई बांटस्यां
गाजै-बाजै रै साथ
सुपातर घर आई जी।
बेटी तो जासी सासरै
बहू बेटी री ठौड़
बहू रो जतन करां जी।
बेटो तो फूल गुलाब रो
बहू म्हारै काळजिया री कोर
आसीसां रो मेह बरसाय...
बहू रा लेबां वारणा जी।
लाडी म्हारै घर आवै जी।
म्हारो हियो हरखावै जी।
सौनल लावण लावै जी।
म्हारो बंस बधावै जी।
मोहरां मेह बरसावां राज।
बहू रा लेवां वारणां जी राज।
