देस री बुनियाद किरसो
सगळा रो पेट भरै किरसो।
बारी—बारी फसल लेंवतां,
खून—पसीनो बहावै किरसो।
धरती री कोख चीरै वो,
लहलहाती फसलां उनावै किरसो।
खुद जैहर पीर पिलावै इमरत
बादळां नै जमीं बुलावै किरसो।
खेत—खळिहान उणरा तीरथ,
जिणरी बंदगी करे किरसो।
तकलीफां में काढ जिनगाणी,
रात रा आंचळ आफळै किरसो।
फसलां गावै जदै राग मलार,
मन झूम ज्यावै खेत—किरसो।
चांदी री ताकड़ी तोलै सुपना,
चांद—तारां सूं ऊंचो किरसो।
बारनै झांक रैयी आंतड़ियां,
लालच री लार नीं टपकावै किरसो।
देस री उन्नति रो सुपनो,
आसा रा झूलां झुलावै किरसो।
दुख—दरद रो दरिया उमड़तां
लाचार कदै नहीं हुवै किरसो।
भुलाय देवै बोझ बायरो फूंक सूं,
भाखर सो जिगर राखै किरसो।
माथां तगारी हाथां में फावड़ो,
कांधै हळ ले'र मुस्करावै किरसो।
उगळै जद धरती सोनै रा दांणा,
गरीबी रा गरब नै डरपावै किरसो।
