जिण दिन पीड़ उधारी थांरी,
कविता री ओळयां मंड जासी,
वीं दिन सुणळे बीरा म्हांरा,
बेस्यावां सीता बण जाती,
भरी जुवानी राख रमावण
काया रा सिणगार सजूं मैं?
किण भावां रा गीत रचूं मैं!
नमिया निबळा कांधां माथै,
पीड़ पराई ढ़ोयां सरसी,
इण पाथर सूं उण भाखर सूं
पग-पग ठोकर खायां सरसी
ठौड़-ठौड़ जग रो मुजरो है
देखूं रोऊं, किया हँसूं मैं,
किण भावां रा गीत रचूं मैं!
खुद री निजरां सांमी ही जद,
घर री होळी बळ जावै है,
भोग्योड़ौं वो जूण-जथारथ
कवितावां मैं ढळ जावै है
सबद सबद री साख भरूं
करमां री करणी कियां कथूं मैं?
किण भावां रा गीत रचूं मैं!
जग में जस री धन री, बीरा
कोनी थाह, कदै नीं पावै,
पण गीतां रो मोल बजारां
तोल ताखड़ी मती मुलावै
रीत रायतां निभतां सांतर
थनै सांवरा कियां भजूं मैं?
किण भावां रा गीत रचूं मैं!
