स्सौ कीं जाणतां थकां ई
अणजांण हुयौ
क्यूं भटका मारतो रैवूं
खटारा साइकल रै सायरै
मंडता रैवै– बिगड़ता रैवै
अणूंता चितराम– हियै जियै
जद के जाणूं हूं–
म्हैं बाज रा तीखा पंजां सूं
चीरीजतै किणी भोळै-ढाळै पाखी तकात नै
नीं बंचाय सकूं।
खिंडती झूंपड़्या रै डोकां सूं
निसरती भूख-प्यास री चीखां नै
नीं दे सकूं– थ्यावस रा दो सबद
अर नीं हवेल्यां री नींव रै
रगतसण्यां भाटां नै उखाड़ सकूं
लाचारी री आ अणदीठ लाय
बाळती रैवै म्हारौ रूं रूं
करती रैवै काळजै रा टुकड़ा टुकड़ा
अर म्हनै म्हारौ हुवणौ ई
जैर रा गुटका पीवणै रौ
अैसास करावै।
कद तांई रैवैला आ खैंचातांण
खोटाई बाट-सागै-ताकड़ी में कांण
किणनै पूछूं
कुण देवैला पड़ूतर
मोटा सिंगासण ई जांणै
बण्योड़ा अणजांण
अर आगलै दिन फेरूं
चक-चक करतै
चर्र-चर्र करतै
कर्र-कर्र करतै
इण सूंनै सैर मांय
नीकळ जावूं भटका खावण
खटारा साइकल रै सायरै
सेवट कद तांई
सेवट कद तांई?
