कफन में जेब नीं
सोनो, चांदी लाख घड़ाले
हीरा-मोती खूब कमा ले।
पण तू पगला अबै जाणले
कफन में जेब नीं होवैलो।
कूड़ सांच रा भारा बांध।
आप रो भार, आप उठावैलो।
खाली हाथ तूं आयो है।
खाली हाथ तूं जावैलो।
काम क्रोध री आग में
जिन्दो तूं तो जळ जावैलो।
छल-कपट काम ना आसी
कर्म कमाई ही साथै चालैली।
मोह-माया रै मोह में रम
आकळ-बाकळ तूं होवैलो
सत रो मारग चुण लै भाया
सत सूं ही जमारो सुधरैलो।
आयो जिको तो जावैलो
लिख्यो-लिख्यो तूं खावैलो।
दान-पुन री पकड़ ले लाठी
भंवरो इक दिन उड़ जावैलो।
