जका जमीं सूं
जुड़्या रैवण रो
करता हाको
फाड़्यां बाको
ऊड़ै अकसां
अर अपणा ईं
भूखा-तिस्या
मैनतकस मिनखां रै हक नैं
कर कवजै में वोट लेयनैं
लोट देयनैं
लोटां सूं जद काम सरै नीं
तद हाथां में सोट लेयनैं
खुद ई खाली पाना माथै मोहर छापनैं
मरो भलांई पाना माथै मोहर छापनैं
मरो भलांई भूखो करसो
जमीं छोड़नैं
घर-गुवाड़ी अर गांव छोड़नैं
सहरां कानी रैयो दोड़तो...
पण थै ई कद जुड़्या जमीं सूं
जिण जुग मांय जुड़या जनजन सूं
लड़्या लड़ाई तन-मन सूं
सुख-सांयत रै सुपनां साथै
पण अब भूखी
परजा नैं भरमावो क्यूं थै
अणपढ़ राख जमीं सूं तोड़ो
मैंगाई रो मारो कोड़ो
खुद बंगला में मौजां मारो
बांरै मारग में बण रोड़ो
छोड़ जमीं कुरसी सूं जुड़ग्या
जीव जावै नीं मांचो छोड़ो।
